Nuna nota de prensa, Gestha esplica que dalgunos d'esos cambios son la desgravación por compra o construcción d'una vivienda antes del 1 de xineru del 2013, la compensación de les perdes xeneraes por un fondu d'inversión, acciones o derivaos financieros coles ganancies patrimoniales llograes o la exención de tributar hasta 60.100 euro si se trabaya nel estranxeru.

   Anque Gestha asegura que los contribuyentes que más se beneficien de les ventayes fiscales son les 63.124 persones que declaren ganar más de 150.000 euros, afirma que la mayoría de los declarantes pue aprovechales y aforrar nel IRPF unos 5.168 euros de media, siempre que dispongan de daqué de dineru aforrao.

   En tou casu, recuerda qu'hai que tener en cuenta que l'aforru fiscal máximu que pue llograr un ciudadanu ye l'equivalente a la so carga real del IRPF, dao que Facienda namás devuelve les retenciones. Ello ye qu'al 97% de los declarantes d'IRPF que gana menos de 60.000 euros nun-y convién invertir hasta la llenda máxima de les deducciones disponibles porque nun aprovecharía les cuantíes deducibles que superen la so carga real del IRPF.

   P'amenorgar al máximu la factura fiscal de la declaración de la Renta del 2015, que va presentasse ente los próximos meses d'abril a xunu, los técnicos ellaboraron un decálogu de conseyos fiscales pa ponelo en práctica, antes qu'arranque'l nuevu añu.

   En concreto, Gestha sorraya que la recta final del añu pue ser una ocasión perfecta pa facer aportaciones a un plan de pensiones o a un plan de previsión aseguráu, y que les persones que mercaron la so vivienda o realizaron dalgún pagu pa la so construcción antes del 1 de xineru del 2013 van siguir esfrutando del so derechu a la desgravación siempre y cuando tuvieren deducciones por dicha vivienda nel 2012 o años anteriores.