Según esplicó Montoro, esti gastu correspuéndese con "contratos de participaciones público-privaes de va más d'una década", y añadió que se trata de "anotaciones en materia contable que nun tienen por qué producise" y, poro, "el tripartitu (Bancu d'España, INE y la Intervención Xeneral del Estáu) tien l'encargu d'entamar una investigación", de la que darréu s'informará a Eurostat.

   Esti gastu conocióse esti mesmu añu y, acordies cola esplicación de Montoro, el criteriu d'Eurostat ye que s'anote nel exerciciu nel que surde, siempre y cuando dichu exerciciu tovía nun tea zarráu, polo qu'a lo último imputáronse al añu 2015, daqué que yá se notará nos datos de déficit de les comunidaes que van conocese mañana, según esplicó'l ministru, que participó nunes xornaes del IESE.

   El pasáu 21 d'ochobre'l Ministeriu de Facienda y Alministraciones Públiques comunicó que diba imputar 1.500 millones estra al déficit del 2015 por contratos de Cataluña y el Conceyu de Zaragoza del añu 2013 qu'acababa de conocer.

   Nel casu de Cataluña l'aumentu del gastu nel 2013 yera de 1.318 millones derivaos de contratos firmaos n'años anteriores y que se correspondíen, según comunicó la Generalitat, a inversiones en carreteres y centros penitenciarios.