Eslovenia anunció esti xueves que va empezar a devolver a los "inmigrantes económicos" que lleguen dende la vecina Croacia, dempués de que Naciones Uníes denunciara qu'otros países de los Balcanes empezaron a llendar el pasu namás a sirios, afganos ya iraquinos.
Un voceru de la Policía indicó qu'Eslovenia namás va aceptar a los inmigrantes de "países onde hai enfrentamientos armaos". "Nos últimos díes, tán llegando cada vez más persones que tenemos razones pa creer que son inmigrantes económicos", indicó en declaraciones per escrito a Reuters Drago Menegalija.
"Anunciamos formalmente a Croacia que vamos devolver a un grupu d'inmigrantes económicos. Tovía nun recibimos una respuesta de la parte croata", añadió.
Eslovenia tornó en país de camín de los cientos de miles d'inmigrantes y refuxaos que tán llegando a Europa'l mes pasáu cuando Hungría decidió zarrar la so frontera con Croacia, obligando a estes persones a buscar un nuevu camín hacia norte del continente, especialmente a Alemaña.
Foto: SRDJAN ZIVULOVIC / REUTERS
