El ministru del Interior francés, Bernard Cazeneuve, anunció esti llunes que se procedió al arrestu de 23 sospechosos nel marcu de les operaciones llevaes a cabu poles fuerces de seguridá la pasada madrugada nel marcu de la respuesta a los atentaos del pasáu vienres en París.
Según el ministru, hai 23 persones deteníes y les fuerces de seguridá confiscaron 31 armes, incluyíes "cuatro de guerra", amás de diverso material informático tres los 168 rexistros. Coles mesmes, nes últimes 48 hores púnxose a 104 persones baxo residencia vixilada, dao que son "oxetu d'atención particular".
Ente los arrestaos figura un individuu de Ródano que tenía na so vivienda y na de los sos padres un llanzacohetes, asina como armes y munición, chalecos antibales y brazaletes de la Policía. Los arrestos produxéronse nun total de 19 departamentos y grandes ciudaes, precisó, asegurando que "nun va olvidase nengún territoriu".
Cazeneuve esplicó que la declaración del estáu d'emerxencia de magar los atentaos permitió afondar nel trabayu de prevención, centráu particularmente naquellos imanes y mezquites qu'afalen al odiu y les asociaciones que faen apoloxía de la violencia.
"La respuesta va ser amplia y total", aseguró Cazeneuve, alvirtiendo que'l Gobiernu francés va ser "implacable" con aquéllos que "tán poniendo a prueba la República". "Los terroristes nunca van destruyir la República porque ye la República la que los va destruyir a ellos", remachó.
Foto: PHILIPPE WOJAZER / REUTERS
