El jueves 19 de payares, a les 19:30 hores, comienza nel Salón Parroquial de Vega (Xixón) la proyección de los documentales Los que vuelven (1930) y A bruxa de Brañavara, nuna actividá programada dientro del eventu 10 años deL'Arribada y que cuenta cola collaboración de l'Asociación de Vecinos San Emiliano de Vega y l'apoyu económicu del Ayuntamientu de Gijón/Xixón.
Los que vuelven; duración 27 minutos
Rodada nel branu de 1930 por un grupu d'emigrantes asturianos en L'Arxentina, esta película resultó ser una pequeña ayalga onde podemos atopar l'ayeri de llugares bien conocíos de los conceyos de Xixón, Noreña y Sieru. Xunto a ello, el testu de los rótulos obra del escritor Pachín de Melás qu'apaez nes imáxenes y una escena, con iniciu nel minutu quince, descubierta como'l testimoniu audiuvisual más vieyu de gochos de la raza asturcelta. Títulu fílmicu mui interesante que vemos restauráu y musicáu sobre una copia que facilitara l'estudiosu de la lliteratura asturiana Xurde Blanco.
Enllaz venceyáu: Clip de "Los que Vuelven" http://www.youtube.com/watch?v=nc3xKgLucMQ
A bruxa de Brañavara; duración 40 minutos
Ye'l primer documental rodáu en fala o gallego-asturianu. Realizáu por Illán Gonzali y conducíu por Alberto Álvarez Peña, esti mediumetraxe de 2010 recuérdanos que n'Asturies había homes y muyeres que teníen el don de ver a los muertos y falar con ellos. Inda queda'l recuerdu de munchos, persones como Consuelo, d'Aldín (Valdés), Xuan Samboldro, de Serín (Xixón), Ramona de Rufabar (Piloña) o Josenón d'Arnao (Castrillón), ente otros.
En Bual nació Amparo López, más conocida como A bruxa de Brañavara. Amparo entraba en trance pa comunicase colos muertos y mediar ente éstos y los vivos. La so fama foi grande, hasta'l puntu de que la revista Triunfo dedicára-y l'artículu Una bruxa auténtica en Brañavara, nel so númberu del 3 de xunu de 1978. D'ella, y de los sos fechos, trata esti documentu. La so figura nun s'escaeció na parte más occidental de la nuesa comunidá autónoma.
Enllaz venceyáu: Clip de "A bruxa de Brañavara" http://www.youtube.com/watch?v=I2PL0ltxKJQ
