El xuráu valora la orixinalidá, complexidá de la historia, l’interés temáticu y l’anovación de les soluciones gráfiques y cromátiques
Asturies.-El músicu y diseñador gráficu Rumaldo Antón Barbero de Diego, Ruma Barbero, ye'l ganador de la septima edición del Premiu Alfonso Iglesias de Cómic en llingua asturiana, que con una dotación de 3.000 euros concede la Conseyería d’Educación y Cultura del Principáu d'Asturies.
El xuráu encargáu de valorar les obres presentaes tuvo formáu pol dibuxante Enrique Carballeira Melendi, ganadorde la edición pasada; M.ª Concepción Prieto Pérez, profesora y especialista en llingua asturiana; el dibuxante Berto Álvarez Peña y los filólogos Luis Casteleiro Oliveros y Xosé Miguel Suárez Fernández.
A esti gallardón podíen presentase cómics d'estilu, tratamientu y tema llibres, escritos en llingua asturiana y con una estensión mínima de cincuenta páxines siempre que fueren inéditos y non premiaos n'otros concursos, anque pa participar yera bastante presentar un proyectu inicial con una estensión mínima de quince páxines
Ente les obres presentaes, el xuráu decidió, por unanimidá, conceder el Premiu al cómic tituláu El viaxe a la lluz, destacando, como consta nel acta, “la orixinalidá y complexidá de la historia, l’interés temáticu y l’anovación de les soluciones gráfiques y cromátiques”. El testu presentóse col seudónimu Charles Atlas. N’abriendo la plica, l'autor ganador resultó ser Rumaldo Antón Barbero de Diego.
Ruma Barbero (Xixón, 1971) ye llicenciáu en Belles Artes pola Universidá de Salamanca, músicu, diseñador gráficu y profesor de cómic na Universidá Popular de Xixón. Yá algamara nel 2009 esti premiu na so primer edición con Manzajú, editáu al añu siguiente y tien ganaos otros prestixosos premios autonómicos de cómic como El Llapiceru y Comarca de la Sidra. Miembru fundador de los grupos de folk asturianu Felpeyu y Los Citriquinos, ye amás lletrista pa estos y otros grupos musicales, autor de cartelos teatrales, cinematográficos, de conciertos y festivales de cine.
Como autor gráficu tien publicao, la mentada novela Manzajú; La Chelita. El Salvador 1992 y Aguantando cachones. Dende 2011 publica un fanzine/blog con obra inédita y recopilación de trabayos anteriores en http://aguantandocachones.Blogspot.com/
