El Tribunal Superior de Xustiza de Galicia (TSXG) confirmó que la estaya sesta de l'Audiencia Provincial d'A Coruña, con sede en Santiago, condenó a dambos por un delitu d'asesinatu cola concurrencia del agravante de parentescu.

   El maxistráu Jorge Cid Carballo emitió la sentencia cuando tán a un tris de cumplise dos selmanes dende que'l xuráu popular declarara culpables a dambos padres de la muerte d'Asunta, un veredictu que llegó tres cuatro xornaes de deliberación.

   Asina, el xuráu consideró probao, por unanimidá, que lo mesmo Alfonso Basterra como Rosario Porto suministraron de común acuerdu y repetidamente a Asunta, mientres polo menos trés meses antes de la so muerte, una melecina que contenía lorazepam y que'l padre foi l'encargáu de mercar esti fármacu, polo menos en trés ocasiones ente xunetu y setiembre.

   De la mesma, apoyaron el fechu de que dambos, "puestos de común acuerdu p'acabar cola vida de la so fía", suministráron-y una cantidá tóxica d'esta melecina'l día 21 de setiembre del 2013 mientres una comida familiar y que, dempués de les 18.15 hores, Asunta foi hasta la vivienda de Montouto (Teo) en compañía de Rosario Porto y d'Alfonso Basterra.

   El veredictu tamién consideró probao que los acusaos "afogaron a la so fía Asunta" na vivienda de Montouto nun periodu ente les 18.33 y les 20.00 hores del 21 de setiembre, aplicándo-y presión sobre la boca y la ñariz. A lo último, determinó que la amarraron de brazos y piernes nun momentu próximu a la muerte con cuerdes plástiques de color naranxa y que, cuando finó, la víctima "nun pudo defendese" porque taba baxo los efectos del lorazepam.