Dellos camiones cargaos con valles llegaron a primer hora del día a la población eslovena de Veliki Obrez, ubicada cerca de la frontera con Croacia, onde yá se llevantaron cerca de dos kilómetros de valla.

   Coles mesmes, les autoridaes llevantaron otros cien metros de valla nuna zona abierta cerca de la población de Gibina, nel este del país. De momentu, nun hai inmigrantes presentes en nengún de los dos puntos, que cuenten con un gran esplegue del Exércitu y la Policía.

   La decisión criticóla Croacia, que dixo que "sería meyor que construyeren centros de recepción". "Nenguna valla pue evitar que la xente busque'l so camín, y ye meyor que lo faigan de forma entamada", apuntó'l ministru del Interior croata, Ranko Ostojic.

   El primer ministru d'Eslovenia, Miro Cerar, afirmó'l martes que se llevantaríen "barreres técniques temporales" na frontera con Croacia pa "dirixir" el tráficu migratorio, anque esclaró que'l país va siguir abiertu pa los miles de refuxaos qu'intenten siguir la so ruta hacia'l centru d'Europa.

   El primer ministru insistió en que nun se trata d'un bloquéu: "Nun vamos zarrar la frontera". "Queremos garantizar qu'haya un fluxu d'inmigrantes controlao y seguro, y torgar una catástrofe humanitaria", xustificó.

Foto: SRDJAN ZIVULOVIC / REUTERS