Bogotä (E.P.).-  L'ex presidente colombianu Andrés Pastrana retó a les Fuerces Armaes Revolucionaries de Colombia (FARC) a negar que tienen negocios col líder del Cártel de Sinaloa, Joaquín 'El Chapo' Guzmán, y otres organizaciones criminales.

   "Si güei les FARC nos dicen que nun son socios de 'El Chapo', si nos dicen que nun son socios del Cártel de los Soles, asociáu a (el presidente del Parlamentu de Venezuela) Diosdado Cabello, pues bien, pero que lo digan", dixo.

   Pastrana alvirtió que, si se demuestra que los guerrilleros "son socios de narcotraficantes", entós "van dir a la xusticia ordinaria" porque nun cumpliríen el requisitu de "contar la verdá" qu'esixe la xusticia transicional.

   Conforme al acuerdu sobre xusticia transicional robláu'l 23 de setiembre pol Gobiernu y les FARC, si la insurxencia miente sobre los delitos cometíos nel marcu del conflictu nun va poder recurrir al tribunal de paz, que contempla penes alternatives a la cárcel.

   El negociador de les FARC Ricardo Téllez contestó a Pastrana, recordando los sos intentos como presidente colombianu de roblar la paz cola guerrilla. "¿Somos un cártel de la droga o una fuerza político militar?", plantegó.

   "La mala fe y pequeñez de Pastrana nun tienen nome ¿ONU, UNASUR, Estaos Uníos, Noruega, Chile, Cuba y Venezuela reúnense con 'narcos' en L'Habana?", señaló, n'alusión a los actores qu'intervienen nel procesu de paz colombianu.

LES FARC Y 'EL CHAPO'

   Investigaciones llevaes a cabu pol Gobiernu de Panamá planteguen la existencia d'un nexu ente 'El Chapo' y la guerrilla colombiana, nel marcu d'una rede criminal que traficó cocaína del sur al norte d'América y qu'opera nel país centroamericanu.

   La Policía y el Ministeriu d'Esteriores de Panamá confirmaron al diariu mexicanu 'El Universal' la existencia d'una estructura mafiosa con más de mediu centenar persones --que tán en procesos de la xusticia panamiega--, liderada por una pareya de mexicanos, pa los que Panamá reclama la so estradición.

   La Policía de Panamá cree que'l matrimoniu de mexicanos, asitiáu nel país, encargóse d'establecer los contactos col colombianu Martín Leonel Pérez Castro, de nomatu 'Richard', identificáu como xefe del Frente 30 de les FARC.

   "A esta pareya, fichada depués de venir al territoriu nacional a llevar a cabu negociaciones rellacionaes con drogues, dáse-y siguimientu y agora ta presa en Méxicu", aseguren les autoridaes policiales panamiegues.

   'Richard', deteníu en Colombia en xunetu del 2014, tendría un papel destacáu nel tráficu de droga en Buenaventura, puertu clave na ruta de la droga pol corredor del Pacíficu. El dineru del narcotráficu diba valir pa financiar actividaes de les FARC.

   Panamá yá se mostró dispuestu a entregar a Estaos Uníos tola información ente les FARC y 'El Chapo', dao que'l Cártel de Sinaloa ye la organización criminal que más droga mueve hacia y dientro del país norteamericanu.