“Nestos intres hai que priorizar la dinámica asturiana y facer por aniciar un procesu costituyente nel nuesu país”

Arturu X. Bermeyu, Secretariu Xeneral d’Andecha Astur comunicó’l determín de la organización de nun participar nes prósimes elleiciones estatales del 20 d’avientu al atalantar que la coyuntura política española plantega estes elleiciones en clave continuista d’enfrentamientu a los procesos  costituyentes qu’agora mesmo avancen especialmente en Cataluña.

Andecha Astur allíniase asina con esos procesos costituyentes, dende la reconocencia de la especificidá del mesmu nel nuesu país. Precisamente por esa razón, considera prioritario cientrar los esfuercios en reforciar la dinámica asturiana y poner los encontos pa qu’esi procesu seya vidable n’Asturies, en cuentes de marafundialos nestes elleiciones estatales.

Respeutu al prósimu Conceyu Nacional d’Andecha Astur, a cellebrar el 21 de payares, Arturu X. desplicó que nesta fase ta llevándose alantre un importante alderique internu, y la intención ye que de magar dichu CN esti alderique puea llevase al conxuntu de la sociedá asturiana, nuna dinámica participativa dafechu que permita afayar el discursu y les formes a la rialidá social.

Pa finar, Arturu X. tamién remembró qu’esti añu Andecha Astur cellebra’l so 25 aniversariu, “un bon momentu pa facer repasu y planificar el futuru”