El Ministeriu de Sanidá de Rusia anunció esti vienres l'acabación del procesu d'identificación visual de les víctimes del accidente aereu n'Exiptu, magar que señaló que los pruebes d'identificación xenético tovía nun terminaron, según informó l'axencia rusa de noticies Sputnik.
Les autoridaes ruses comunicaron el xueves que 58 de les víctimes del accidente tán dafechu identificaes, y mientres la tarde d'esi mesmu día lleváronse a cabu los primeros funerales.
Un Airbus 321 de l'aerollinia rusa Kogalimavia estrellóse nuna zona montascosa de la península del Sinaí, onde operen grupos armaos que desafían al Gobiernu d'Abdelfatá al Sisi, en despegando nel resort turísticu de Sharm el Seij camín de San Petersburgu.
Provincia del Sinaí, un grupu que xuró llealtá al Estáu Islámicu, atribuyóse --hasta dos veces-- el derribu del avión "en respuesta a los bombardeos rusos que mataron a cientos de musulmanes en territoriu siriu".
Espertos rusos y exipcios, amás de franceses y alemanes en representación d'Airbus, investiguen l'accidente sobre'l terrén. Les dos caxes negres recuperáronse, pero una d'elles --la que recueye les conversaciones en cabina y col control de tierra-- ta parcialmente estropiada.
Como midida de precaución delles aerollinies alemanes, franceses, irlandeses y emiratines decidieron rediseñar les sos rutes pa evitar sobrevolar la península del Sinaí hasta que s'esclaren les causes del accidente.
