"Tenemos que preparanos pa la posibilidá de que cerca de 5.000 sigan llegando cada día dende agora hasta febreru del añu que vien. Si esti fora'l casu, contemplamos la llegada de 600.000 refuxaos ya inmigrantes ente payares y febreru del 2016", dixo.

   Asina, calcó en qu'esti ritmu d'entraes "pondría la cifra en más d'un millón mientres esti añu". Alredor de 760.000 persones cruzaron yá'l Mediterraneu, principalmente hacia Grecia ya Italia, en fuxendo de les guerres en Siria, Iraq y Afganistán, lo mesmo que d'otros conflictos n'África.

   Nel 2014, 216.000 persones llegaron al continente per vía marítima buscando asilu, una cifra equivalente al númberu d'entraes mientres el mes d'ochobre d'esti añu.

   "Si nun tomamos les midíes necesaries, tarrecemos que más xente muerra poles dures condiciones del iviernu n'Europa. Yá vimos dellos fundimientos nes mariñes griegues y tenemos mieu de que la xente puea morrer nel camín ente Grecia y el centru y norte d'Europa", valoró Spindler.

   Más de 3.400 inmigrantes morrieron intentando llegar a Europa per vía marítima no que va d'añu. Esti mesmu xueves, un neñu morrió y otru ta desapaecíu tres un naufraxu frente a la isla griega de Kos.

   ACNUR solicitó a los países donantes 96,15 millones de dólares (88,4 millones d'euros) pa sufragar les sos actividaes de cara al iviernu. Con esta cifra, el llamáu  d'emerxencia de la organización algama yá los 172,7 millones de dólares (unos 158,7 millones d'euros).

   La organización va adaptar los refuxos y centros de recepción yá existentes y va aumentar el repartu d'ayuda básica pa combatir el fríu pa incluyir ropa d'abrigu y cobertores. Ello ye que non en toles zones los refuxaos muévense n'autobuses y trenes, sinón que lleguen a caminar llargues distancies antes de poder llegar a una nueva parada.

Foto: SCANPIX SWEDEN / REUTERS