Sánchez volvió garantizar el so compromisu cola llucha contra'l fraude fiscal nel marcu d'un actu nel que dellos de los sos candidatos a les elecciones xenerales firmaron un compromisu éticu nel que, ente otres coses, aseguren que tienen una voluntá irreductible de "caltener una conducta íntegra".

   Amás, el líder de los socialistes volvió sacar pechu de les midíes anticorrupción que plantega'l so partíu, frente "a los trés" que proponen Ciudadanos y Podemos, y cuando'l PP nun ofrez "nenguna". "Yo soi un políticu llimpiu, que dirixe un partíu llimpiu y qu'aspira a goberar un gobiernu llimpiu", afirmó Sánchez.

   El candidatu del PSOE púnxose como oxetivu devolver la confianza de los ciudadanos ante les instituciones y los políticos y, pa ello, esplicó otra vuelta la batería de midíes que lleven los socialistes nel so programa electoral.

   Ente elles, hai iniciatives nel ámbitu de la prevención, midíes penales y procesales, pa regular meyor la financiación de partíos, na contratación y les sovenciones públiques, amás d'en materia fiscal.

   El compromisu firmáu esti miércoles polos candidatos, ente los que  tuvieron los primeros aspirantes de la llista por Madrid -- como Meritxell Batet, Irene Lozano, Zaida Cantera y Eduardo Madina, pero tamién por dellos dirixentes que nun van nes llistes, como Jordi Sevilla y Angel Gabilondo, inclúi amás la promesa de dimitir darréu de los sos cargos si se-yos abre xuiciu oral por un delitu grave.

   Tamién aseguren que nengún gastu de representación va superar los 600 euros selmanales o los 1.500 mensuales, y asumen que los expresidentes del Gobiernu central y les comunidaes autónomes van arrenunciar "automáticamente a beneficios y percepciones salariales vinculaos a la so condición" si exercen una actividá profesional siguida y retribuida.