La ministra de Salú francesa, Marisol Touraine, anunció esti miércoles nuna entrevista al diariu Le Monde qu'acabó un tabú y una discriminación. "De magar la primavera del 2016, nun va poder escluyise a naide pa donar sangre en función de la so orientación sexual", confirmó.

   Touraine avanzó que la midida impuesta en 1983 dirá llevantándose "por etapes". Nuna primer fase, esplicó la ministra, van poder donar sangre "los homosexuales que nun tuvieren relaciones con otru home nos doce meses previos", mientres que nel casu del plasma van poder "si tán nuna relación estable dende va cuatro meses o si nun tuvieron relaciones sexuales nesi mesmu periodu".

   Les autoridaes sanitaries gales van realizar estudios de magar estes primeres donaciones y, "si nun hai riesgos", la normativa va tornar en "xeneral" al añu siguiente. Los cuestionarios previos van "reescribise" pa "precisar" les condiciones previes a la estracción de sangre y determinar "práctiques de riesgu" pa tola población.

   El presidente francés, François Hollande, prometió mientres la campaña electoral llevantar el vetu, una histórica reivindicación de la comunidá LGTBI y de les organizaciones defensores de los Derechos Humanos. A primeros d'abril, los diputaos tamién votaron una enmienda pa reclamar el fin de la prohibición.

   De magar una solicitú presentada por una corte gala, el Tribunal de Xusticia de la Unión Europea pronuncióse esti añu sobre la prohibición de donar sangre a los homes que tuvieron relaciones homosexuales y publicó una resolución de doble llectura.