"Tres les irregularidaes detectaes en dalgunos de los vehículos diésel, el conseyu de dirección de Volkswagen anunció una investigación pa establecer si existen nicios de nueves irregularidaes sobre l'aprobación de los vehículos del grupu", esplica la compañía nuna nota.

   Nel cursu d'estes investigaciones internes, la empresa topó "inconsistencies inesplicables" y tien la conocencia de qu'unos 800.000 vehículos de Volkswagen alcuéntrense afectaos, señala'l grupu, antes d'indicar que les posibles irregularidaes nun afecten a la seguridá de los conductores.

   "De momentu nun ye posible determinar de forma fiable la envergadura d'estes irregularidaes. Una estimación inicial asitia los riesgos en cerca de 2.000 millones d'euros", señala la compañía.

   El conseyu de dirección de Volkswagen va entamar "darréu" "un diálogu" coles autoridaes pa conocer les consecuencies d'estos descubrimientos, al envís d'establecer les consecuencies económiques y llegales, señala.

   Volkswagen diz que va esclarar "lo antes posible" l'algame d'estes posibles irregularidaes y va asegurase que los vehículos afectaos queden clasificaos correctamente en función de les sos emisiones reales de CO2.