En dos autos fechos públicos esti miércoles, la Estaya Cuarta de la Sala de lo Penal, órganu superior al maxistráu instructor, refuga los recursos d'apelación presentaos pola defensa de Neymar y el presidente del Barça, Josep María Bartomeu, contra l'abertura de la investigación, na que tán querellaos, xunto col so antecesor nel cargu, Sandro Rosell, y el padre del futbolista, ente otros, por estafa y corrupción ente particulares.

   Nel autu que resuelve'l recursu de Neymar, los maxistraos Ángela Murillo, Carmen Paloma González y Juan Francisco Martel (ponente de la resolución) destaquen que la querella qu'entamó la investigación, presentada pola empresa de representación de futbolistes DIS-Esportes y Organizaçao d'Eventos, tien "consistencia delictiva" al plantease nel "órganu xudicial competente" y describir "los elementos de los tipos penales que la parte querellante caltién que se pudieron perpetar".

    Los miembros de la Sala refuguen, como pidió la defensa de Neymar, que los fechos investigaos nesta causa seyan los mesmos que los que se persiguen nel procedimientu que se sigue por delitos fiscales y alministración deslleal nel Xulgáu d'Instrucción númberu 22 de Barcelona, a favor del que De la Mata desabrióse en mayu pasáu.

   "Magar que básicamente l'exerciciu de dambes acciones criminales apoyóse nos mesmos documentos soscritos peles partes, les sos conductes son distintes, independientes y nun tán interrelacionaes", señala l'autu antes d'añadir que los dos procedimientos tienen "plena autonomía".