En concreto, la norma va aplicase de forma transitoria de magar setiembre del 2017, cuando va permitir un nivel d'emisiones d'óxidu de nitróxenu (NOx) de 168 mg por kilómetru nes prebes en carretera. La llexislación va ser definitiva de magar setiembre del 2019, cuando les emisiones van poder algamar a lo más los 120 mg/km.

   Bruxeles aspiraba a que la flexibilidá fuera del 60% nun periodu transitoriu de dos años y que dempués baxara al 20%, pa cubrir ciertu marxe d'error nes midíes. La Comisión calculara qu'un 10% de los vehículos sometíos a exame nun superaríen estes prebes, según fontes europees.

   Los controles en carretera y baxo delles situaciones de conducción van sumar a partir de xineru a los que yá se realicen en llaboratoriu, coles mires d'evitar nuevos fraudes como'l del grupu Volkswagen, que tracamundió los sos motores diésel pa falsiar los resultaos cuando los sometíen a controles oficiales.

   Queda por ver de qué manera se tendrá en cuenta na concesión de los permisos el resultáu de les prebes de llaboratoriu al respective de les de conducción cuando éstos seyan vinculantes.

   La decisión d'esti miércoles ye'l resultáu d'un votu en comisión d'espertos que prosperó col apoyu de tolos Estaos miembros, nun siendo'l votu en contra de Países Baxos y l'astención de República Checa, según informaron fontes europees.

   Los principales países productores, ente ellos Alemaña, Francia ya Italia, col apoyu d'España, llograron disolver enforma la propuesta que defendía la Comisión Europea.