Nuna entrevista na Cadena Ser, recoyida por Europa Press, Rajoy  sorrayó que'l PP nun empezó tovía a ellaborar les candidatures pa les xenerales --dispón de plazu hasta mediaos de payares--. "La verdá ye que sí, tenemos que faer les llistes. Pues nun empecemos tovía", esclamó.

    Tocantes a si la vicepresidenta y ministra de la Presidencia, Soraya Sáenz de Santamaría volverá ser el so 'númberu dos' como va cuatro años, Rajoy señaló: "Pos nun lo planteé, pero en concencia, yo toi encantáu col llabor que desarrolló a lo llargo d'estos últimos años. Supongo que sí, nun se m'ocurre nenguna razón  pola que nun vaya a selo".

    Ante esta respuesta, preguntóse-y si nun ta claro que Santamaría lu siga nel segundu puestu de la llista de Madrid al Congresu. El xefe del Executivu contestó: "Yo creo que va dir de númberu dos, pero ye que tovía nun falé con naide d'esti asuntu".

    Sobre si Cospedal va encabezar la llista del PP al Congresu por Toledo, Rajoy aseguró que tampoco trató esti tema cola secretaria xeneral de los 'populares'. "Nun lo sé porque tampoco falé con ella. Nun sé si quier quedar en Castiella-La Mancha o presentase a diputada a les Cortes Xenerales", manifestó.

NUN CUESTIONEN EL SO LIDERALGU NEL PP

   No que cinca a les informaciones publicaes estos meses tres el retrocesu electoral del PP, Rajoy aseguró que nengún miembru del so partíu díxo-y qu'él seya una retranca. "O nun dicen la verdá cuando falen conmigo o nun dicen la verdá cuando falen con ustedes (los periodistes). Espero que seya cuando falen con ustedes cuando nun digan la verdá", recalcó.

   Nesti sen, señaló que nel PP "nun cuestionen" el so lideralgu y repitió que "de nenguna manera" considérase una retranca pa la so formación. Según añadió, "tocó-y" gobernar na llexislatura más difícil pero actuó con "determinación y valentía", tomando midíes que llevaron a que "muncha xente se fadiara" con eses decisiones. "Tienen perfectu derechu a facelo conmigo y coles decisiones que tomó'l mio gobiernu", repostió.

   Ante la posibilidá de que dalgún partíu como Ciudadanos puea esixi-y dar un pasu atrás pa que'l PP puea gobernar, el presidente del Gobiernu dixo que nun cree que'l restu de partíos nun respeten la voluntá popular y "al candidatu" que la xente votó. Según añadió, "el sentir democráticu" torgaría faer eso. Amás, recordó que n'España hai un sistema parlamentariu y non presidencialista.

Foto: Cadena Ser.