La decisión acordóse, per mediu d'una providencia, nel marcu de la causa qu'investiga'l presuntu amañu de l'axudicación de les obres del hospital de referencia de Baleares, conocíu como Son Espases, un procesu nel que, según llegaba a afirmar el fiscal anticorrupción Pedro Horrach na querella que dio pie a estes investigaciones, "la perversión algama'l so máximu esponente".

   Castro estiende agora les pesquises a la reforma de la sede del PP, pa lo que solicitó'l llistáu de les empreses contrataes y subcontraes pa realizar estos trabayos y les factures orixinales de los pagos.

   Partes d'estes obres pudieron llevase a cabu sin costu dalgunu pal partíu per parte d'empresarios que, a cambiu, resultaríen beneficiarios nos trabayos de Son Espases, o podríen tar a les puertes de llograr esta axudicación, según punxeron de manifiestu fontes de la investigación a Europa Press.

   Según la confesión efectuada nesta causa pol antiguu conceyal d'Urbanismu del Conceyu de Palma Javier Rodrigo de Santos, el PP de Jaume Matas, que presidía daquella'l Govern, reclamó hasta nueve millones d'euros a cuenta de la concesión de les obres del hospital, que recayó a lo último, n'avientu del 2006, en manes de la UTE liderada por Dragados tres un procesu que ta investigándose.

PIDÍASE'L 3 POR CIENTU POR CADA AXUDICACION

   De Santos abondó amás nel fechu de que yera práctica avezada nel PP balear, baxo l'últimu mandatu de Matas (2003-2007), exixir el 3 por cientu en comisiones por cada axudicación cola connivencia del partíu a nivel nacional. L'antiguu conceyal apuntó amás que yera l'extesoreru del PP y cuñáu de Matas, Fernando Areal, el que mediaba nel cobru de les comisiones.

   Castro esplora de forma paralela, dientro de la última pieza separada abierta nel marcu del casu Palma Arena, la financiación presuntamente illegal del PP balear asina como la reforma de la so sede. Los sos pagos diríen  al cargu d'empresarios favorecíos cola axudicación de delles obres públiques mientres la última llexislatura de Matos.

   El xuez, ente otra documentación, tien sobre la mesa los interrogatorios efectuaos al constructor Juan Serra, que reconoció recibir dineru negro na sede del PP, tres encargase de la so reforma -hasta 70.000 euros en metálico y sin factura al traviés d'Areal-, según al alministrador de la empresa Over Marketing, Daniel Mercado, que declaró de la mesma pactar con Matas poder cobrar parte de los gastos de les campañes electorales en dineru opaco al fiscu.

   Mercado manifestó inclusive qu'existía l'acuerdu col exministru de que parte de los gastos que se debíen cobrar en negro y a lo último nun se cobraron, quedaríen compensaos col volume d'axudicaciones de contratos públicos que se-y prometíen.

EL PROCESU DECANTÓSE DE PRIMERS A FAVOR D'OHL

   Nel casu de Son Espases, el procesu d'axudicación decantóse de primeres a favor de la competidora OHL. El so presidente, l'exministru Juan Miguel Villar Mir, alcuéntrase imputáu nes investigaciones. La constructora desbancóse como favorita dempués de que'l Colexu Oficial d'Inxenieros de Caminos, Canales y Puertos y el d'Economistes variaren les puntuaciones de primeres axudicaes pola empresa privada Global PM.

   Preguntáu por esta última empresa, De Santos esplicó que se trataba d'una mercantil averada al PP y, más en concreto, al exconseller d'Interior y expresidente del partíu en Palma, José María Rodríguez.

   Na so querella, almitida por Castro'l pasáu xunetu, Horrach asevera cómo tres "la realidá formal" del procesu d'axudicación hai "una falsa apariencia de corrección y llimpieza, baxo la qu'existen maniobres criminales fraudulentes pa tracamundiar el concursu con finalidaes escures".

   Na so denuncia, el fiscal sorraya amás el fechu de que nesti procesu dase'l "paradigma" col que "con demasiada frecuencia se axústense intereses económicos y políticos nuna espiral onde l'interés público ye la última razón a considerar o nun tien cabida".

   Tocantes a los presuntos autores de los fechos, apunta que foi Matas el que "ordenó la manipulación del concursu" al traviés de l'antigua conseyera de Salú, Aina Castillo, l'antiguu xerente del Ib-Salut Sergio Beltrán y el presidente de la Mesa de contratación, Juan Sanz -yá fináu-, "pa beneficiar ilícitamente" a la UTE liderada por OHL.

"PROBLEMA POLÍTICU" SI LES OBRES NUN S'AXUDICABEN A DRAGADOS

   Pela so parte, Castillo, que tamién s'emprestó a collaborar colos investigadores, señaló de la mesma que foi'l mesmu Matas el que dio instrucciones pa manipular el concursu, y que llegó a dici-y qu'habría un "problema políticu" si la concesión nun recayía en manes de Dragados, filial d'ACS, presidida por Florentino Pérez.

   La exconsellera relató cómo de primeres Matas ordenó que l'axudicación decantárase a favor d'OHL, magar, cuando'l supuestu tratu de favor se filtró na prensa, comentó-y los inconvenientes que se produciríen si una obra de tal "valumbu" nun s'axudicaba a Dragados.