Madrid (E.P.).-El secretariu xeneral de Podemos, Pablo Iglesias, celebró esti llunes que'l presidente del Gobiernu, Mariano Rajoy, convocara "por fin" les elecciones xenerales pal próximu 20 d'avientu, y denunció que la llexislatura qu'agora acaba resúmese en "más corrupción que nunca" y más desigualdá.

   "Foi una llexislatura marcada pola corrupción y l'aumentu de la desigualdá", resumió'l líder de Podemos na comparecencia qu'ofreció ante los medios na sede del partíu de la cai Princesa de Madrid, pa valorar la convocatoria d'elecciones y los cuatro años de Gobiernu de Rajoy.

   Cola cita electoral yá formalizada, Iglesias afirmó que Podemos asume esti retu con munches ganes y "muncha ilusión" y coles mires de llevar al Gobiernu y al Parlamentu "un nuevu país que taba fuera" de les instituciones.

   "Esi nuevu país llegó yá a gobernar a los nuevos conceyos d'España y aspiramos a qu'esi nuevu país llegue non solo al nuevu parlamentu que va salir de les elecciones del 20 d'avientu sinón que llegue tamién a la Moncloa, al Gobiernu d'España", aseguró.

   Coles mesmes, llanzó una dura crítica contra Ciudadanos, qu'esti fin de selmana faló "d'un partíu a trés" y trató de sacar a Podemos de la carrera hacia la Moncloa. "Nós salimos a ganar. Hai dalgunos que dicen que son un punteru, paez qu'esto díxolo Ciudadanos, que son una punteru pal PP y el PSOE. Por desgracia pensamos que demostraron que besen el suelu per onde pisen los partíos vieyos", refugó.

   "Vimos por desgracia a Ciudadanos apoyar al Gobiernu del PSOE de los ERE n'Andalucía y de la Gurtel en Madrid. Besar los pies per onde camina'l bipartidismu nun ye'l cambiu. Nós tenémoslo bien claro y los ciudadanos saben que nun vamos consentir mas corrupción nes instituciones", recalcó.

   Nesta llinia, denunció que "lo mesmo'l PP como Convergencia tornaren en trames mafioses" y llamentó qu'haya "dellos dispuestos a gobernar con trames mafioses". "Tol mundu sabe que nun ye'l casu de podemos. Hai un país fuera del Parlamentu esperando entrar nel parlamentu y nel Gobiernu y eso implica una cosa bien clara", alvirtió.

   "Hai que sacar a les maquinaries de corrupción y nós, a diferencia de los nuesos rivales, tenemos claro que coles maquinaries corruptes nun se gobierna, nun se pacta y nun se besa'l suelu per onde caminen", sentenció.

   Asina, preguntáu en concreto sobre la decisión del xuez José Castro d'investigar les obres de remodelación de la sede nacional del PP, Iglesias insistió en qu'esta formación "tornó claramente nuna mafia corrupta", y dexó de ser "un partíu políticu na práctica". "Nun puen siguir gobernando, y nós  vamos trabayar pa echalos", insistió.