El balance podría aumentar nes próximes hores por culpa de que les comunicaciones quedaron atayaes na zona más afectada pol seísmu, nel cordal del Hindu Kush. N'unu de los incidentes más graves, polo menos  doce neñes morrieron nuna avalancha de persones rexistráu tres el seísmu na salida d'una escuela na provincia afganistana de Tayar.

   "Cayeron baxo los pies d'otres estudiantes", esplicó'l director provincial de l'Axencia Nacional de Xestión de Desastres d'Afganistán, Abdul Razaq Zinda. El temblón sintióse nel norte d'India y en Paquistán, onde cientos de persones abandonaron dellos edificios pola medrana a que s'esbarrumben.

   "Tábamos bien asustaos... Vimos a persones abandonando los edificios y tábamos acordándonos del nuesu Dios", contó per teléfonu dende'l valle del Swat el periodista paquistanín Zubair Jan. "Taba nel mio coche y, cuando paré, el coche taba tremeciendo como si daquién lu tuviera solmenando", relató.

   El terremotu tuvo'l so epicentru a 254 kilómetros al nordés de Kabul y l'hipocentru a 212,5 kilómetros de fondura. El Serviciu Xeolóxicu d'Estaos Uníos (USGS) informó nun primer momentu d'un seísmu de 7,7 de magnitú y, darréu, rebaxó la intensidá hasta 7,5.

   N'Afganistán morrieron 17 persones, incluyíes les doce escolares finaes en Nangarhar. En Paquistán, hasta'l llunes de tarde confirmárense 38 muertes, na so mayoría nes rexones del norte y del noroeste, na frontera con Afganistán.

   Una de les provincies más afectaes pol movimientu telúricu ye la rexón de Chitral, nel norte del país, onde once persones morrieron, según contó Shá Jehan, un responsable policial. El periodista Gul Hammad Farooqi, de 47 años d'edá, aseguró que la so casa esbarrumbóse. "Hubo una gran destrucción equí y la mio casa esbarrumbóse. Afortunadamente, los mios fíos y yo escapamos", señaló.

   Más al sur, na ciudá de Peshawar, polo menos una persona morrió y otres 150 resultaron firíes y tán recibiendo tratamientu nun hospital. N'Afganistán, les organizaciones humanitaries estranxeres informaron que les comunicaciones móviles quedaron atayaes.

   "El problema ye que nun sabemos. Munches de les llinies siguen cayíes", señaló Scott Anderson, 'númberu dos' de la Oficina de Coordinación d'Asuntos Humanitarios de Naciones Uníes en Kabul. El gobernador de la provincia de Badajshán, Shá Waliullá Adib, informó de qu'unes 400 cases derrumbáronse pol temblón pero nun dio cifres de víctimes. "Tamos atropando información", señaló.

   Esti terremotu llega seis meses dempués de que Nepal sufriera un movimientu telúricu'l 25 d'abril que dexó más de 9.000 muertos y 900.000 cases estrozaes xuntu col terremotu de retruque rexistráu un mes dempués.

   La zona montascosa d'Afganistán ye una rexón bien activa en términos sismolóxicos, como resultando de la conexón de la placa subcontinental india cola euroasiática.

Foto: PARWIZ PARWIZ / REUTERS