"Pueo dicilo con arguyu", dixo Rajoy en La Moncloa tres la xunta estraordinaria del Conseyu de Ministros pa convocar les elecciones xenerales, onde recordó qu'España taba nel 2011 "nuna cayida sin frenu" que la condenaba a la quiebra, la salida del euru o'l rescate si daquién nun ponía igua. "Yera preciso detenela y cambiar el rumbu", dixo.

   Según el xefe del Executivu, "lo primero llogróse nel añu 2012 y lo segundo nel añu 2013. Y los otros dos años de llexislatura valieron p'avanzar a un ritmu creciente" nos trés oxetivos que se marcara'l Gobiernu: empléu, crecimientu y confianza.

   Ello ye que Rajoy dixo que nel so discursu d'investidura señaló con claridá les sos prioridaes y dexó claro que dedicaría tola capacidá del Gobiernu y de les fuerces de la nación a detener la sangría del paru, afondar nel crecimientu y entainar la creación d'empléu. "A salir lo primero posible del círculu infernal que xeneraba la falta de confianza, la escasez de financniación, la cayida de les inversiones y el consumu, la destrucción d'empléu y l'esbarrumbe de los ingresos", añadió.

   Al so paecer, güei y gracies a les reformes España pasó de vivir baxo l'amenaza del rescate a espertar confianza, de la recesión más llarga al crecimientu más altu de la UE y de la destrucción d'empléu a la creación de puestos de trabayu más alta d'historia. Según Rajoy, el crecimientu, l'empléu y l'enfotu "son les exes" del cambiu qu'esperimentó España nesta llexislatura y ponen de manifiestu l'esfuerzu que ficieron los españoles.

   Amás, el país crez de forma "equilibrada y caltenida" y non pela vía del endeudamientu como n'años anteriores. Ello ye que Rajoy cree que la meyora de la competitividá consiguida sin devaluar la moneda nesta llexislatura ye una de los grandes tresformamientos del país.

Coles mesmes, destacó l'aumentu del enfotu dientro y fuera de les fronteres, que se llogró porque España foi capaz d'amenorgar a la metá'l déficit públicu y relaxar la prima de riesgu a los 110 puntos básicos. "Güei naide fala de la prima de riesgu", dixo'l presidente, qu'indicó qu'esti cambiu permitió aforrar más de 20.000 millones nel pagu d'intereses.