El Comité Éticu ta estremáu en dos estamentos, l'órganu d'instrucción (presidíu por Cornel Borbely) y l'órganu de decisión (presidíu por Hans-Joachim Eckert), encargaos de resolver los recientes escándalos qu'afecten a la FIFA.

   "Les investigaciones relatives a Ángel María Villar Llona y Franz Beckenbauer yá se pasaron al órganu de decisión. Por razones procesales, de momentu nun van revelase los nomes de más afectaos", anunció la FIFA al traviés d'un comunicáu.

   Amás, l'órganu d'instrucción del Comité d'Ética entamó investigaciones contra Eugenio Figueredo (exvicepresidente de la FIFA), Nicolás Leoz (expresidente de la Conmebol), Jeffrey Webb (expresidente de la Concacaf), Ricardo Teixeira (expresidente de la Confederación Brasileña de Fútbol), Worawi Makudi (presidente de la Federación Tailandesa de Fútbol), y Amos Adamu (exmiembru del Comité Executivu de la FIFA), toos ellos sospechosos de violar el Códigu Éticu de la FIFA.

   Per otra parte, l'órganu d'instrucción confirmó que yá tán "en cursu" les investigaciones contra'l presidente de la FIFA, Joseph Blatter y el presidente de la UEFA, Michael Platini, dambos suspendíos mientres 90 díes. El casu refierse al pagu de dos millones de francos suizos (1,8 millones d'euros) a Platini en febreru del 2011.

   "L'órganu d'instrucción va facer tolo posible p'asegurase que l'órganu de decisión de la Comisión d'Ética, presidíu por Hans-Joachim Eckert, tome una decisión dientro del períodu de suspensión de 90 díes (qu'empezó'l 8 d'ochobre) de los dos presidentes", esplicó la FIFA.

   L'órganu d'instrucción tamién confirmó les investigaciones en cursu contra Jérôme Valcke, agora poco suspendíu como secretariu xeneral de la FIFA por cuenta de les sospeches de malversación de fondos y d'otres infracciones de los reglamentos FIFA.

Foto: DANI MALO/EUROPA PRESS