Habrá sesta entrega de 'Jungla de Cristal'. La próxima película de la saga va ser una precuela que va tener llugar 10 años antes de la película orixinal y que va esplorar los orixes del míticu John McClane, que nesti casu va tar interpretáu por un mozu actor. Pero una película de 'Jungla de Cristal' nun diba ser lo mesmo sin 'Bruce Willis', asina que Fox yá pensó la manera de contar col actor anque seyan namás un 'caméu'.
L'estudiu nun quier renunciar a la cara principal de la saga y gran reclamu de la mesma y decidió que Willis va apaecer na película, dando vida -una vez más- a McClane nel presente. Un 'episodiu' dientro de la nueva película que podría llevanos hasta la so trama principal al traviés d'un 'flashback'.
De momentu, l'actor y l'estudiu nun llegaron a nengún acuerdu, anque según recueye Deadline, Willis ta bien implicáu nel proyectu. Na siella de director vuelve sentase Len Wiseman, que yá dirixó la cuarta entrega de la saga.
Sicasí, sin llibretu nin guionista, too apunta a que la historia va tener como protagonista a un mozu John McClane que trabaya como policía en Nueva York en 1979 y va mostrar cómo llega a tornar nel tipu duru que vemos na película orixinal.
ESTRENU NEL 2017
Con Wiseman al frente y Lorenzo Di Bonaventura como productor, la precuela de 'Jungla de Cristal' va llegar a los cines nel 2017. Dellos rumores señalen que Samuel L. Jackson podría volver dar vida a Zeus Carver, personaxe que pudimos ver en 'Jungla de Cristal III: La Venganza'.
Dende'l so estrenu en 1988, la saga de 'Jungla de Cristal' recaudó nos cines de tol mundu 1.435 millones de dólares. La primer entrega amasó un total de 140 millones de dólares y les sos socesores fueron aumentando esa cifra. 'La jungla 2: alerta roja' algamó los 240 millones de dólares, mientres que les trés últimes superaron los 300 millones. La quinta entrega, 'La jungla: un buen día para morir', recaudó nes sales 383 millones de dólares.
Foto: FOX
