La Rede Española d'Inmigración y Ayuda al Refuxáu presentó ante la Fiscalía Xeneral del Estáu una denuncia al traviés de los sos servicios xurídicos contra'l cardenal arzobispu de Valencia, Antonio Cañizares, poles sos declaraciones d'esti miércoles que consideren "apoloxía del odiu" hacia les persones refuxaos y d'orixe inmigrante.
Na denuncia, espónse que'l cardenal Cañizares cuestionó esti miércoles si "la invasión d'inmigrantes y refuxaos ye tou trigu llimpio" y preguntóse si "vienen namás porque tan persiguíos".
"El cardenal nun dudó en calificalo d'invasión a Europa en llinia colos gobiernos d'estrema derecha y formaciones de la derecha radical y procedió a cuestionar hasta que los solicitantes d'asilu tean realmente persiguíos", critiquen dende la Rede.
Pa la entidá, estes declaraciones "trespasen les llendes de la opinión" y entren "al ámbitu del ataque y la promoción del odiu". Amás, consideren que nesta crítica "espéyase, anque non de forma espresa, el refugu a la relixón mayoritariamente musulmana de dichos refuxaos".
Amás, encamienten a les formaciones de les Cortes Valencianes que tramiten "una reprobación urxente" frente a estes palabres que "namás fomenten l'odiu y la discriminación".
