L'Exércitu d'Israel construyirá una nueva valla de 62 kilómetros na frontera cola franxa de Gaza, dempués de que decenes de persones llograren trespasar la actual y entraren en territoriu israelín mientres les protestes celebraes nos últimos díes, según informó'l diariu israelín 'Yedioth Ahronoth'.
Delles decenes de manifestantes palestinos cruzaron el martes la valla na frontera, provocando la intervención de les fuerces israelines, qu'emplearon gases llarimosos p'aventalos.
El voceru del Exércitu israelín, Peter Lerner, denunció que mientres los violentos disturbios "realizáronse disparos contra un vehículu de les IDF xunto a la valla de seguridá nel sur de la Franxa de Gaza".
La protesta prodúxose nel marcu de les tensiones de les últimes selmanes ente israelinos y palestinos. Siete israelinos morrieron n'ataques de palestinos, principalmente apuñalaos, dende primeros d'ochobre, mientres que más d'una trentena de palestinos morrieron nesti mesmu periodu, 18 d'ellos n'enfrentamientos coles fuerces israelines mientres les protestes.
Foto: SUHAIB SALEM / REUTERS
