Polo menos trés israelinos morrieron y delles decenes resultaron firíes de diversa considerancia nos cuatro ataques cometíos esti martes pela mañana en Xerusalén Este y na población de Raanana, nel centru d'Israel, según informó'l diariu israelín 'Yedioth Ahronoth'.
Tres los ataques, les autoridaes israelines ordenaron el zarru de toles carreteres de Xerusalén, pero reabriéronse darréu.
El Movimientu de Resistencia Islámica (Hamás) aseguró que los ataques son "un mensaxe" pa toos aquéllos que quieren "estropiar los llugares santos". "Llamamos a siguir la intifada, que ye la respuesta natural al silenciu del mundu", sorrayó.
Los dos ataques de Xerusalén, rexistraos nos barrios de Talpiot y Geula, acabaron cola vida de trés israelinos y dexaron a otres 17 persones firíes. Amás, hubo otros dos ataques na población de Raanana, próxima a Tel Aviv y asitiada nel centru d'Israel.
El primer ministru israelín, Benjamin Netanyahu, convocó una xunta d'urxencia del so gabinete de seguridá a les 15.00 hores d'esti martes. La xornada del llunes acabó con seis israelinos firíos en trés ataques cometíos por palestinos que depués morrieron a tiros.
Dende la celebración de la festividá xudía Rosh HaShana'l pasáu mes de setiembre, seis israelinos morrieron y decenes d'ellos resultaron firíos en dellos ataques cometíos por palestinos.
Nesti periodu, polo menos 26 palestinos morrieron por disparos israelinos, de los que diez yeren autores d'ataques y el restu perdieron la vida n'enfrentamientos coles fuerces israelines.
