L'aviación rusa realizó 88 misiones y 86 bombardeos contra posiciones d'Estáu Islámicu en Siria nes últimes 24 hores, según informó esti martes el Ministeriu de Defensa, lo que supón una cifra récor dende que Moscú entamó la so intervención nel país el pasáu 30 de setiembre.
Nun comunicáu, el Ministeriu precisó que los bombardeos algamaron posiciones del grupu terrorista nes provincies de Raqqa, Hama, Idlib, Latakia y Alepo, destruyendo arsenales d'armes, campos d'entrenamientu y centros de mandu, ente otres instalaciones.
Rusia entamó'l pasáu 30 de setiembre los sos bombardeos aéreos en Siria a pidimientu del réxime de Bashar al Assad. Los bombardeos, dirixíos contra Estáu Islámicu según Moscú y Damascu, intensificáronse nos últimos díes.
El Ministeriu sorrayó que nes últimes 24 hores, los aviones rusos "intensificaron la intensidá de los bombardeos contra centros de mandu y zones d'almacenamientu d'Estáu Islámicu" y de resultes de los bombardeos, "les unidaes d'Estáu Islámicu perdieron bona parte de la so munición, equipamientu militar pesao y material".
Ante estes circunstancies, según Moscú, los milicianos de negru tán tratando de facer llegar combustible y munición dende Raqqa, el so principal bastión en Siria y capital del so antoproclamáu califatu per mediu de "vehículos que circulen fuera de les carreteres principalmente de nueche".
Foto: EDUARD KORNIYENKO / REUTERS
