L’actu d’Homenaxe a la Revolución Asturiana d’Ochobre’l 34 perafitó la voluntá de siguir l’exemplu d’aquellos asturianos que toparon na independencia’l camín del socialismu.

Una guapa xornada onde nun faltó’l nuberu y onde “homenaxeamos al Pueblu Trabayaor Asturianu que na so llucha pol socialismu declaró nel 34 la República Obrera y Campesina d’Asturies. Una revolución trunfante aplastada xabazmente pola República española y que tres años dempués declararíase de nueu soberanu ya independiente de la República española comu únicu camín p’avanzar haza’l socialismu y la llibertá”.

Delantre la tumba de Belarmino Tomás, el nacionalismu d’izquierda perafitó un añu más la so voluntá de siguir l’exemplu d’aquellos asturianos y asturianes que toparon na independencia’l camín del socialismu.

Na intervención política destacáronse los paralelismos d’aquellos tiempos colos d’anguañu y cómu, salvando les llóxiques distancies, el camín del socialismu pasa pola definición d’Asturies comu marcu específicu de la llucha de clases y la refuga dafechu de cualisquier dependencia o sucursalismu español. “Los sucursalistes españoles, seyan de dreches o d’izquierdes, tresmiten el mesmu mensaxe: la incapacidá d’Asturies pa decidir llibremente’l so futuru”.