Madrid/Colloto (E.P.).-L'Audiencia Nacional considera que les realmisiones de los trabayadores de Coca-Cola Iberian Partners en Fuenlabrada (Madrid) produxéronse "regularmente", dao qu'estima que na realmisión de los trabayadores na planta madrilana caltiénense "milimétricamente" les categoríes profesionales, los salarios y horarios que teníen primero que la fábrica tornara en centru loxísticu.

   Nel autu, la sala contestualiza la realmisión de los trabayadores acordada pola mesma Audiencia Nacional na so sentencia de xunu del añu pasáu y pon fin a un conflictu ente la multinacional de bebíes refrescantes y los sos emplegaos de más d'un añu, anque contra la presente resolución puede interponese recursu de reposición, en plazu de cinco díes, de magar el siguiente a la recepción de la notificación.

   L'Audiencia Nacional resalta nel casu de Fuenlabrada que "contra tou pronósticu y en contradicción col so nuevu modelu organizativu", l'embotellador únicu n'España decidió reabrir el centru, magar como centru loxísticu y non como fábrica en "una manifiesta voluntá de concluyir pacíficamente'l conflictu".

   Amás, señaló que los trabayadores de la planta madrilana "llograron tolos oxetivos que yeren posibles" como son los empleos, los salarios y los horarios y, anque se modificaron les sos funciones, prodúxose dientro de les llendes, según la sala, de la movilidá funcional ordinaria y constitúi la solución "más razonable" pa la liquidación de conflictu.