La Eurocámara tomó esta posición nuna resolución (aprobada por 383 votos a favor, 266 en contra y 10 astenciones), por mor de delles quexes de ciudadanos europeos, na so mayoría españoles, sobre les lleis hipotecaries na UE y los instrumentos financieros de riesgu, como les preferentes.

   Nel testu, los eurodiputaos apunten que'l Códigu de Bones Práctiques pa la reestructuración de deudes hipotecaries foi "mayoritariamente ignoráu" polos bancos, polo que tuvo un "efectu llendáu" al frenar el númberu de desahucios o favorecer alternatives como la dación en pagu.

   Según los datos que recueye la resolución, n'España produxéronse unos 400.000 desahucios, mientres l'entamu de la crisis nel 2008 y el primer trimestre d'anguaño.

   Otra de les cuestiones sobre les qu'alerta la Eurocámara ye'l númberu de víctimes de fraude financieru n'España, en referencia a la venta que xulga "deslleal" de productos financieros de riesgu a 700.000 españoles, a los que les sos entidaes nun informaron apropiadamente de los riesgos de la operación.

   Nesti sen, los eurodiputaos piden a la Comisión Europea que supervise la correcta aplicación n'España de la normativa comunitaria en materia d'instrumentos financieros, y que compruebe les denuncies recibíes y evalúe los resultaos del sistema d'arbitraxe. Tamién confía nel Executivu comunitariu pa presentar propuestes llexislatives pa regular les insolvencies de les families.

   La comisaria de Consumu, Vera Jourova, yá dixo'l pasáu llunes que Bruxeles ye consciente de la "difícil situación" de munchos españoles por esta cuestión, pero consideró apropiaes les midíes del Gobiernu pa protexer los derechos del consumidor. Con too, Jourova recordó que l'Executivu comunitariu ta examinando la información enviada poles autoridaes españoles nel mes de xunu sobre'l cumplimientu de la directiva sobre condiciones contractuales.