El trabayu d'Alexievich inclúi una serie de llibros conocíos como Voces de la Utopía sobre los individuos na antigua Unión Soviética, asina como trabayos sobre les consecuencies de la catástrofe nuclear de 1986 en Chernóbil y la guerra de Rusia n'Afganistán. "Al traviés del so estraordinariu métodu - un 'collage' curiosu compuestu por voces humanes- Alexievich afonda na nuesa comprensión de toa una dómina", afirmó Danius, que destacó la figura de la galardonada como "inventora" d'un "nuevu xéneru lliterariu".

   Nacida n'Ucrania (31 de mayu de 1948) pero criada en Bielorrusia, Alexievich ye fía de dos profesores, padre bielorrusu y madre ucraniana. Graduóse en periodismu na Universidá de Minsk y mientres unos años compaxinó'l so llabor periodísticu cola tradición familiar de la enseñanza. Pero'l so amor pola obra del escritor bielorrusu Alés Adamóvich fizo qu'a lo último apostara poles lletres.

   La so obra, de marcáu corte periodísticu y qu'aveza sumar testimonios individuales pa radiografiar la realidá soviética o, como ella escribe nos sos llibros, "el gran home coloráu", algamó notoriedá con 'La guerra no tiene cara de mujer', publicada en 1983, centrada nel papel de les muyeres ruses mientres la Segunda Guerra Mundial.

   Una obra que namás tuvo cabida nel marcu de la Perestroika de Gorbachov y que llegó hasta a estrenase en versión teatral sobre les tables de Moscú espertando non pocu discutiniu. Otros de los sos títulos más notables son 'Los jóvenes de Cinc' (1989), 'Cautivados por la muerte' (1993), 'Voces de Chernóbyl' (publicada en 1997 y que nesti momentu ye la so única obra tornada al español) y 'El tiempo de segunda mano. El final del hombre rojo' (2014).