"La OTAN ta preparada y capacitada pa defender a tolos aliaos, incluyíu Turquía, frente a cualquier amenaza", aseguró'l noruegu en declaraciones a la prensa a la so llegada a la xunta de ministros de Defensa de l'Alianza Atlántica, preguntáu polos pasos prácticos concretos de los aliaos pa dar seguridá a Ankara tres les violaciones del so espaciu aéreu per parte d'aviones de combate rusos.

   Stoltenberg aseguró que la OTAN yá dio pasos pa responder a los desafíos de seguridá, lo mesmo al este como al sur, en concreto, p'ameyorar la so "preparación pa esplegar fuerces, incluyendo al sur, y Turquía si ye necesario".

   Los aliaos tamién dieron pasos pa crear una fuerza conxunta de bien alta disponibilidá de 13.000 efectivos capaz d'intervenir en cuestión de díes, dientro de la so Fuerza d'Intervención Rápida, y comprometiéronse a doblar el so númberu de militares tamién hasta los 40.000 y p'entainar la toma de decisiones.

   "Too esto ye una respuesta a los desafíos que vemos al este, pero tamién a los desafíos que vemos al sur", aseguró, citando espresamente los conflictos en Siria ya Iraq.

   Stoltenberg repitió la "preocupación" pol fechu de que Rusia nun ta dirixiendo principalmente los sos ataques contra l'Estáu Islámicu sinón que ta atacando a otros grupos de la oposición y "ta apoyando al réxime" de Damascu y encamentó-y dexar de facelo porque "nun ye una contribución constructiva pa una solución pacífica y duradera en Siria".

   "Pido a Rusia que xuegue un papel constructivu y cooperativu na llucha contra l'Estáu Islámicu y nun siga apoyando al réxime porque apoyar al réxime nun ye una contribución constructiva pa una solución política, pacífica y duradera, en Siria", dixo, insistiendo en que se precisen anovar esfuerzos pa iniciatives polítiques p'atopar una solución política a la crisis siria", puesto que "al llargu plazu" nun hai "solución militar" posible.