L'expresidente del Gobiernu y presidente d'honor del PP, José María Aznar, encamentó esti llunes al xefe del Executivu, Mariano Rajoy, "cavilgar" sobre la victoria de Ciudadanos sobre'l PP nes elecciones catalanes, nes qu'al so xuiciu'l partíu d'Albert Rivera fízose cola "primacía" del centru derecha, lo que, según avisó, pue tener la so importancia na dirección de votu nes xenerales.

   Mientres la so intervención nel coloquiu 'España y América Llatina ante los retos d'un nuevu sieglu', entamáu pol Foru Futuru n'Español na Casa d'América de Madrid, Aznar defendió que tendría que ser "digno de reflexón" que l'electoráu constitucionalista decantárase'l pasáu 27 de setiembre por Ciudadanos en cuenta de facelo pol PP.

   Una situación que l'expresidente d'Executivu atriubyó a qu'esi electoráu considera que l'orde constitucional pue defendelu meyor Ciudadanos que'l partíu que preside Mariano Rajoy.

   Nesti puntu, tamién punxo de relieve la victoria del PSOE sobre Podemos na cita electoral catalana lo que, na so opinión, pue provocar que nos comicios xenerales de últimos d'añu'l votu de la izquierda vaya a los socialistes.

   Aznar remarcó qu'ésti ye namás un diagnósticu, como'l que fizo nel comunicáu qu'emitió la selmana pasada pocu dempués de conocese los resultaos electorales de Cataluña, onde se llendó a poner "los fechos enriba de la mesa".