D'esta manera, el déficit del Estáu caltiénse dientro de los marxes de cumplimientu del oxetivu pal añu 2015, que s'asitia nel 2,9% del PIB. Escluyendo'l gastu por intereses --que rexistra una cayida del 1,3% interañal--, el déficit primariu baxa hasta'l 0,69%, un 49,8% menos que nel mesmu periodu del 2014.

   Ente xineru y agostu, los recursos non financieros del Estáu rexistraron un crecimientu interañal del 5,5%, hasta 114.220 millones. Esti resultáu debióse a la evolución de los ingresos impositivos, qu'entainaron el so crecimientu hasta'l 6,7%.

   En concreto, los impuestos sobre la producción y les importaciones crecieron un 7,9%, principalmente pol gran dinamismu del IVA, que rexistró un crecimientu del 7,3%. Pela so parte, los impuestos corrientes sobre la renta y el patrimoniu, qu'inclúin los ingresos por IRPF ya Impuestu de Sociedaes, elevaron el so crecimientu al 4,9%, magar la rebaxa d'impuestos de la reforma fiscal.

   Les tresferencies ente Alministraciones Públiques aumentaron un 40,4% pol efectu de la liquidación definitiva del añu 2013 del sistema de financiación y les rentes de la propiedá baxaron un 42% por cuenta de la cayida de dividendos pol descensu de los correspondientes al Bancu d'España y los menores ingresos por intereses, que baxaron un 54,9%.

   A lo último, los ingresos derivaos de la venta de bienes y servicios baxaron un 13,1%, lo que se debe en gran midida al descensu de les comisiones d'avales concedíos a les entidaes de creitu.

Pela so parte, los empleos non financieros sumaron 141.544 millones, un 1,2% menos. Esti añu inclúyense dos operaciones sin correspondencia nel mesmu periodu del añu anterior: l'estracoste pola producción d'enerxía eléctrico nos territorios non peninsulares y la devolución del 25% de la paga estra de 2012. Descontando dambes operaciones, los empleos cayeríen un 1,7% hasta agostu.