Polo menos 453 persones morrieron y 719 resultaron firíes nuna avalancha nel valle de Mina mientres l'Hajj, la tradicional pelegrinación a La Meca, según informó la Dirección de Defensa Civil saudín.
"El balance aumentó a 453 muertos y 719 mancaos", informó'l serviciu de protección civil saudina, nun mensaxe publicáu na so cuenta oficial de la rede social Twitter. L'avalancha rexistróse nuna zona de tránsitu ente los campamentos de los pelegrinos y la ponte Jamarat, llugar dende'l que los pelegrinos lapidan simbólicamente a Satán.
Según informó Arab News, munchos de los firíos tán semiinconscientes. Hasta'l llugar de l'avalancha desplazáronse delles ambulancies pa llevar a los firíos a centros médicos cola ayuda de voluntarios. Les fuerces de seguridá esplegaron cientos d'axentes p'atender la emerxencia. A la mayoría de los firíos lleváronlos hasta l'Hospital d'Emerxencies de Mina y a otros hospitales en La Meca.
L'avalancha tuvo llugar nuna de les cais principales que lleva hasta la ponte de Jamarat. Nesti llugar rexistráronse avalanches con muertos n'anteriores ocasiones, lo que llevó a les autoridaes a ampliar la ponte con delles plataformes pa facilitar el tránsitu y evitar nuevos ábanos.
Foto: DEFENSA CIVIL DE ARABIA SAUDÍ
