Iniciativa pol Asturianu lleva organizando cursos d'asturianu dende la fundación de la organización. Los cursos en Xixón y n'Uviéu son habituales, asina como los cursos a distancia. Amás hebo delles esperiencies formatives n'otros llugares, como València. Agora, y na esmolición por llegar al máximu númberu de persones interesaes por alfabetizase o deprender asturianu, la organización fai un esfuerciu organizativu y de recursos pa poner en marcha clases d'asturianu en 15 cursos en conceyos d'Asturies, incluyendo un cursu de gallego-asturiano n'Ibias, asina como'l so programa habitual d'enseñu a distancia al traviés d'una plataforma Moodle.
Los cursos van celebrase d'una punta a otra d'Asturies, dende Ribeseya a Ibias, pasando peles villes orientales de Les Arriondes o Cangues d'Onís, les grandes ciudaes d'Avilés, Xixón y Uviéu, o les cuenques mineres, con cursos en Sotrondio, Mieres, Llangréu y La Pola (L.lena). Súmense tamién llugares como Posada (Llanera), Candás (Carreño) y Valdesoto (Siero), nel mayor programa de cursos d'asturianu puestu en marcha por una organización asociativa.
La vocación d'esti programa de cursos ye la de tener continuidá nel tiempu y cuntar col escelente profesoráu formáu que collabora cola organización pa poner en marcha estos cursos, asina como con entidaes llocales que collaboren cola organización de los cursos. Esti programa d'alfabetización tien el sofitu de l'Academia de la Llingua Asturiana, qu'otorga los diplomes acreitativos a la fin del cursu.
Dende Iniciativa pol Asturianu tamos mui satisfechos de ser quien a poner en marcha esti ambiciosu programa que tamos seguros que va cuntar col sofitu de la sociedá asturiana. Animamos a tolos interesaos a matriculase nos cursos hasta'l 16 d'ochobre. Entamando los cursos na selmana del 19 al 25 d'esi mesmu mes.
Los cursos, impartíos por profesoráu formáu, tienen una duración de 35 hores, con clases, polo xeneral, dos díes a la selmana n'horariu de tarde (diferente horariu en cada conceyu) La matrícula, incluyendo materiales, ye de 60 euros (50 pa socios d'Iniciativa pol Asturianu y entidaes collaboradores) Al final del cursu, los alumnos que lu superen van recibir un certificáu de l'Academia de la Llingua Asturiana.
La matriculación pue facese al traviés d'un formulariu al que s'accede calcando equí.
Pa más información puedes escribir a contautu@iniciativapolasturianu.org o escribir al traviés de Whatsapp o Telegram al teléfonu 625 986 717
