"El problema del bloquéu ye parte de la negociación. Ye públicu esto. Dambos presidentes falaron d'esto. Ye una cosa pública que va en camín de les bones relaciones que se van buscando", señaló Francisco a los periodistes nel avión papal mientres volaba a Washington dende Cuba pa una visita de seis díes a Estaos Uníos.

   "El mio deséu ye que se llegue a bon términu, que se llegue a un acuerdu que satisfaiga a les partes", añadió Francisco, que va tornar el xueves nel primer Papa en falar nel Congresu d'Estaos Uníos.

   El Gobiernu de Barack Obama anunció'l pasáu vienres nueves normes qu'alivien más el comerciu cola isla, incluyendo dexar a ciertes empreses estaounidenses abrir oficines en Cuba y espandir les actividaes bancaries, pero precisaría una llei del Congresu pa llevantar l'embargu de 53 años.

   El primer Papa llatinoamericanu desempeñó un papel crucial na facilitación d'una canal de comunicación ente Cuba y Estaos Uníos, incluyendo l'envíu de misives a los presidentes Obama y Raúl Castro nel 2014, lo qu'ayudó a que se llograra la restauración de les relaciones diplomátiques en xunetu.

   Francisco, nacíu n'Arxentina, evitó los temes revesosos mientres la so visita a Cuba. El Gobiernu de Raúl Castro tenía mires de que'l Papa condenara l'embargu. El so llevantamientu pidiólu Obama al Congresu estaounidense controláu polos republicanos.

   El Gobiernu cubanu caltién que l'embargu de más de mediu sieglu que-y impunxo Washington ye la principal torga a los sos problemes económicos. Sicasí, hai oposición nel Congresu d'Estaos Uníos pa un próximu llevantamientu del embargu.

   El líder de la Ilesia católica indicó a los periodistes que nel so discursu nun va falar específicamente del tema del embargu, sinón más bien va tratar "polo xeneral los acuerdos binacionales o multinacionales como signos de progresu na convivencia".

Foto: Reuters