Nuna entrevista con iHeartRadio, el guitarrista de The Rolling Stones confirmó que'l grupu yá tien "planes concretos" pa grabar un nuevu álbum d'estudiu. "El nuevu discu ta cada vez más cerca", aseguraba Richards.

   "Nun sé onde, nun sé cuando... pero yá tuvimos una pequeña charra na que falamos de volver directamente al estudiu. Y neso tamos d'acuerdu", señalaba'l guitarrista.

   Keith Richards estendíase tovía más na so esplicación y recalcaba: "Cuándo vamos grabar exactamente ye tovía una entruga ensin respuesta. Yo diría que tres la xira per América del Sur que va tener llugar en febreru, pero nunca se sabe. Quiciabes podamos entrar nel estudiu antes de Navidá, anque ye daqué complicao".

   Nesta mesma llinia, el vocalista de la formación, Mick Jagger, yá desveló va unos meses que tenía un bon puñáu de nuevos cantares que podríen encaxar nun nuevu álbum de los Stones.

   L'últimu discu d'estudiu de los Rolling Stones hasta la fecha ye A bigger band, editáu nel 2005, va yá diez años. Los planes pa la so continuación tán aparentemente en marcha dende primeros d'esti 2015, antes del Zip Code Tour col que viaxaron per Norteamérica hasta metá de xunetu.

   Pel momentu, Keith Richards ta somorguiáu na campaña promocional del so próximu álbum d'estudiu en solitario, Crosseyed heart, que va ver la lluz esti vienres 18 de setiembre.