El subsecretariu del Interior chilenu, Mahmud Aleuy, elevó a cinco la cifra de muertos pol terremotu de magnitú 8,4 na escala de Ritcher rexistráu esti miércoles de tarde en Chile y cifra nun millón los evacuaos tres l'alerta de tsunami declarada pa tola mariña del país, qu'a lo último llendóse a la zona norte.
"Llamentamos el fallecimientu de cinco persones en Chile", dixo Aleuy dende'l puestu de control del la Oficina Nacional d'Emerxencia (Onemi). Coles mesmes, indicó que la presidenta del país, Michelle Bachelet, "decretó zona de catástrofe na poblacióin de Choapa".
Les persones finaes tán identificaes como Lissette Araya Silva, de 35 años, que morrió pol esbarrumbe d'una cubrición; Victoria Gloria Jofré, de 20 años, por un esvaríu de roques; Luis Damaris, de 67 años, que morrió nel hospital por paru cardiacu; Renato Salazar Díaz, de 91 años, que morrió na comuña de Maipú por paru cardiacu; y Humberto Fernández, de 81 años, por paru cardiacu en Valparaíso.
Pela so parte, el director de la Onemi, Ricardo Toro, apurrió un balance a nivel nacional al respective de la situación dempués del terremotu, indicando que "les comuñes d'Illapel, Canela y Salamanca son les más afectaes pol movimientu telúricu".
De primeres, Bachelet aseguró que les midíes tomáronse "de forma bien rápida" y confirmó que tán evaluando si se decreta l'estáu d'Escepción, de la que pidió a les persones evacuaes que se caltengan en zones altes.
"Una vez más tócamos enfrentar un golpe duru de la naturaleza", dixo la presidenta, que va desplazase esti xueves a les zones que se vean más afectaes pol seísmu.
Foto: STRINGER CHILE / REUTERS
