"Paco tamién daba esi tipu de prebendas. Dicía: 'Necesito moces altes, roxes, que seyan putes, pa rellacionase con xente bien importante'", esplica Jiménez nuna conversación que caltuvo cola funcionaria del Conceyu de Boadilla del Monte (Madrid), Ana Garrido, testigu clave del casu que grabó a la so interlocutora y punxo la cinta a disposición del xuez.

   "¿Pa quién yeren, pa la xente de los sobres?", pregúnta-y nesi momentu Garrido, refiriéndose a la relación d'antiguos cargos del Partíu Popular (PP) imputaos nel procedimientu. "P'altos cargos", contesta la secretaria, qu'asegura na conversación qu'al extesoreru Luis Bárcenas "naide-y tusía cuando dirixía les finances de la formación".

   Jiménez tamién detalla que vio a Bárcenas nel despachu de Correa una sola vez, a altes hores de la nueche, cuando nun había testigos y el porteru yá acabara la so xornada llaboral". "Bárcenas, n'espachando con Correa, salía con sobres", comenta, según consta na trescripción de la charra que fizo la Unidá de Delincuencia Económica y Fiscal (UDEF) del Cuerpu Nacional de Policía.

   L'informe policial, al que tamién tuvo accesu Europa Press, detalla que, amás d'a Bárcenas y al so hermanu José, la secretaria de Correa vio na sede de Special Events, nel númberu 40 de la cai Serrano de Madrid, a otros políticos populares'.

ESCUDERO, "GRAN AMIGU" DE CORREA

  Ente ellos cita al presidente del Senáu, Pío García Escudero, al que define como "un gran amigu" de Correa, al exdiputáu Jesús Merino, al exconseyeru de Deportes de la Comunidá de Madrid Alberto López Viejo, al empresariu Jesús Calvo Soria, l'exalcalde de Majadahonda (Madrid) Guillermo Ortega o al exconceyal José Luis Peñas.

   Sobre los sobres que partía Correa, la secretaria asegura que "nun llevaben nomes sinón sigles" y que nun s'apurríen nesta oficina sinón na de la cai Blasco de Garay, na que taba asitiada la sede de Pasadena Viaxes, que, según diz, entamába-y viaxes al fíu d'Aznar". Esta información, según apunta, dar el contable de la trama, José Luis Izquierdo.

EL SICARIU DE CORREA

   N'otru puntu de la grabación la secretaria esplica que llegó a denunciar a Correa en sufriendo "mobbing y malos tratos". Según diz, ésti facía-y quedar hasta "les tantes" na oficina dempués de qu'acabaren les sos xuntes nos hoteles Sanvy o Fénix de Madrid.

   Tamién diz qu'una excompañera de trabayu, de nome Carmen, alvirtió-y que nunca contara nada sobre la compañía. "Maica, nin se te pase dar información sobre la empresa porque conozo a Paco y, si s'entera, mándate un sicariu. Paco nun anda con caxigalines", afirma que-y dixeron.

   La trabayadora confía a Garrido que "nun tien documentación qu'apurrir" en vistes d'una posible denuncia anque "nel so día sí tuvo l'axenda de Francisco Correa, onde había muncha información d'interés". Sicasí, recueye l'informe policial, "nun pensó en llevá-yla cuando coló de la empresa".

   Jiménez detalla, coles mesmes, que'l llugarteniente del so xefe, Álvaro Pérez, 'el Bigotes', "entamó la boda d'Ana Aznar, fía del expresidente del Gobiernu, y Alejandro Agag "con dineru de Special Events". Sicasí, desconoz cómo se facturó porque d'esi llabor encargábase Izquierdo, "que tenía la caxa fuerte nel so despachu".