Uviéu (E.P.).-La Xunta Pola Defensa de la Llingua Asturiana pidió esti martes, al traviés d'un comunicáu, "persones comprometíes colos derechos llingüísticos na dirección de la RTPA", ante la negociación inminente pa designar los xestores de la RTPA.

   La Xunta recuerda a los grupos políticos que'l parlamentu salíu de les elecciones pasaes escoyó a Javier Fernández presidente cola condición, ente otres, de "incrementar la presencia de la llingua y la cultura asturianes" na radiotelevisión pública.

   Pa garantizar la execución d'esti compromisu parllamentariu, la XDLA demanda que los futuros xestores de la RTPA -director xeneral, Conseyu d'Alministración y Conseyu de Comunicación- "seyan persones comprometíes colos derechos llingüísticos. La organización cívica fai un llamamentu espresu a les formaciones polítiques qu'apostaron nos sos programes electorales por una RTPA al serviciu de la normalización llingüística -Podemos, IX y Foru- pa que trabayen con esti oxetivu".

   La XDLA alerta de los riesgos de "volver a apostar por equipos xestores hostiles a la llingua y la cultura propia como los d'estos primeros diez años d'existencia de los medios de comunicación públicos". Un exemplu d'esto ye "la falta de pasos alantre daos dende'l 2007, porque dende que s'estrenaron (obligaos pola llexislación) los primeros espacios, les esperiencies nueves quedaron namás n'anécdota. Too esto pudo vese na programación del Día d'Asturies d'anguaño; mentes que nel 2014 llegó a emitise un 30% nel nuestru idioma, anguaño l'usu del asturianu quedó namás na repetición d'una película doblada que yá s'emitiera en xineru del 2015", acaba'l comunicáu.