Asina lo espresen nun manifiestu publicáu esti martes cola firma de los trés y col logu de "Convocatoria Cívica", una plataforma llanzada por Garzón nel 2013 con decenes de personalidaes de la sociedá civil.

   Jiménez Villarejo, que tuvo ente los promotores d'esa plataforma, foi dempués eurodiputáu con Podemos --abandonó'l puestu por motivu d'edá-- y agora poco pidió en más ocasiones la "unidá popular" y la confluencia ente IU y los de Pablo Iglesias.

   Nel so manifiestu d'esti martes, los trés avisen de que les últimes elecciones demuestren que si los partíos "que defenden el cambiu" preséntense a les elecciones "de forma aisllada" los pactos postelectorales nun van ser abondos "pa llograr una derrota clara del Gobiernu conservador del PP".

   Los firmantes creen que los ciudadanos precisen "un procesu d'unidá que supere les estratexes particulares de cada partíu" pa llograr una mayoría social y defender "una España y una Europa distintes" penriba "de marques y de sigles".

   Nesi sen, alverten que "la unidá y la participación popular nun han ser la mázcara de nenguna táctica mentirosa". La unidá ye güei'l camín que precisa la rexeneración económico, llaboral y política del estáu español.

   Al so xuiciu, "la única manera d'evitar "el trunfu de la derecha" nes xenerales "y de superar el llastre de les polítiques d'austeridá ultraconservadora" ye crear un "frente unitariu", que proponga "candidatures de progresu".

EL PROGRAMA YÁ TA ESCRITU

   Amás, creen que'l programa d'unidá yá lu escribieron "les convocatories qu'axuntaron nes cais mientres meses a los movimientos sociales y a la izquierda entamada" pa defender "la igualdá de derechos ente homes y muyeres, el trabayu dignu, los servicios públicos, la llucha contra la corrupción, los calces participativos" y tamién "les soluciones democrátiques a los alderiques sobre les formes d'articulación territorial y el derechu a decidir de los pueblos".

   Convocatoria Cívica foi una plataforma presentada por Garzón nel 2013, con decenes de personalidaes d'izquierda, ente otres el daquella diputáu d'IU Gaspar Llamazares y l'escritor Luis García Montero, que se presentó a les elecciones autonómiques en Madrid como cabezaleru de llista d'IU (y al que la plataforma dio'l so apoyu) magar nun llograr escañu.

   Ente los firmantes tamién había persones que dempués collaboraron con Podemos, como'l mesmu Jiménez Villarejo, o los economistes Vicenç Navarro y Juan Torres, socialistes como Ana Noguera y Vicenç Garcés (pertenecientes a la corriente Izquiera Socialista), asina como l'exdiputáu del PSOE y ex líder de CCOO Antonio Gutiérrez; periodistes, economistes y xente de la cultura como los escritores Almudena Grandes y Manuel Rivas, los cantantes Joaquín Sabina y Miguel Ríos y la directora de cine Isabel Coixet.

Foto: FIBGAR