El conseyeru d'Educación, Genaro Alonso, mostró esti martes, en declaraciones a los medios, la so intención de promover "una planificación llingúística realista y bien moderada", apostando pol espardimientu y promoción, y la dignificación de la llingua y la cultura asturiana, y del gallegu asturianu".
Asina lo esplicó mientres l'actu d'apertura del cursu escolar en secundaria, celebráu nel IES Marqués de Casariego, en Tapia de Casariego.
Nel actu consideró "superaos los prexuicios que d'antiguo, que dende posiciones supuestamente llingüístiques, negaben a la 'llingua' derechos básicos d'espardimientu y normalización". Na so opinión, la enseñanza y espardimientu del asturianu "pue dir per caminos calmos acordies con una sociedá moderna, democrática y culta".
Per otra parte, informó que les places a convocar nes oposiciones de secundaria y FP, que tendríen de celebrase nel 2016, "van decidise cuando empiece "el trámite presupuestariu".
En referencia a la posibilidá de convocar unes 400 places, estimación que realizó apocayá en declaraciones a la prensa, Alonso matizó que se trata d'una cantidá "estimatoria o deseada". "Quería que fuera, pero decidiráse cuando entame'l trámite de presupuestos, y sobremanera teniendo en cuenta les especialidaes que más lo requieran, les que más tiempu lleven sin convocar oposiciones".
Alonso tamién destacó "la normalidá" cola qu'entama'l presente cursu, y esplicó la celebración del actu en Tapia por dos razones: la conmemoración del 150 aniversariu de la ubicación de la primer piedra del IES y el so interés en tener un xestu hacia la peculiaridá llingüística de la 'fala' o gallego-asturianu.
