Una "gran mayoría" de países mostráronse "comprometíos col principiu" de dar acoyida a estos refuxaos, según informó nuna rueda de prensa final el ministru d'Asuntos Esteriores de Luxemburgu y presidente de vez de la UE, Jean Asselborn.

   Sicasí, les dudes de "dellos países, pocos", torgaron l'acuerdu, según esplicó'l ministru español, Jorge Fernández Díaz, que calcó en qu'España nun plantegó "nenguna reserva" al documentu.

   Les referencies a que'l programa de reubicación fuera obligatorio foi unu de los problemes pal consensu, según indicaron fontes diplomátiques, qu'apuntaron al grupu de Visegrado (Polonia, Hujngría, República Checa y Eslovaquia) y Letonia como les delegaciones que bloquiaron el pactu.

   La negativa de dellos gobiernos a dar acoyida a refuxaos musulmanes, tal como alvirtieron selmanes tras países como Eslovaquia, foi otru de los problemes, a tenor de dicir por Asselborn al términu del Conseyu.

   "Países pequeños como Luxemburgu puen aceptar a dellos centenares de persones que nun tienen la relixón cristiana o tienen un color distintu de piel, y eso tendría que valir tamién pa grandes países como Polonia, República Checa o Eslovaquia", declaró'l luxemburgués. "Hai que vencer esi mieu y tovía non toos tán ehí", añadió.

   Los ministros d'Alemaña y Francia anunciaren de manera prematura l'acuerdu hores primero qu'acabara la xunta, daqué que "nun ayudó" a superar les últimes torgues, según reveló un altu funcionariu parte de les negociaciones.

   Na xunta, amás, l'exe francoalemán insistió na necesidá de reforzar los controles nes fronteres esteriores de la UE y n'implantar de momentu los centros de rexistru de demandantes d'asilu ('hot spot') n'Italia y Grecia, como requisitu previu a empezar la reubicación de los refuxaos que reciben.

   Al atayase l'acuerdu, el testu sobre'l que trabayaben los ministros quedó nuna declaración de la Presidencia luxemburguesa que recueye'l compromisu d'una mayoría d'estaos miembro col proyectu. L'oxetivu ye avanzar nel trabayu técnicu mientres les próximes selmanes, de cara a perfilar un acuerdu definitivu na próxima xunta de ministros d'Interior, el 8 d'ochobre.

   Anque les normes de la UE esixen unanimidá pa zarrar un testu que dea apoyu políticu a una decisión, na práctica nun va ser necesaria dicha unanimidá p'acordar el programa y va bastar que los países favorables sumen una mayoría cualificada.

   El presidente del Conseyu, Donald Tusk, amenazó díes atrás con convocar un conceyu de xefes d'Estáu y de Gobiernu de la UE en septiembre si nun se producíen meyores de caláu na cita del llunes. Asselborn, sicasí, calcó en que'l conseyu de ministros europeos pue tomar decisiones sin necesidá d'unanimidá y que, nesti casu, cuenta con una mayoría "bien, bien amplia".

Foto: Reuters