Bruxeles (E.P.).-El ministru d'Interior, Jorge Fernández Díaz, avisó esti llunes de qu'España considera "zarraes" les cifres de repartu pa l'acoyida de demandantes d'asilu llegaos a Italia, Grecia y Hungría, polo que'l Gobiernu nun va revisar al alza les 1.300 places qu'aceptó comprometer en xunetu pa reasitiar a parte de los primeros 40.000 refuxaos, magar que Bruxeles asignó-y 4.288.

   "Nun vamos cuestionar cifres que tán yá zarraes. Significa un esfuerzu pa España que facemos con munchu gustu, porque somos un país solidariu y somos conscientes del drama humanitariu", esplicó'l ministru a la prensa en Bruxeles, a la so llegada a un conseyu estraordinariu de ministros de la UE sobre la crisis de refuxaos.

   El ministru refierse asina a un primer programa de repartu pa reasitiar a 32.000 demandantes d'asilu llegaos a Italia y Grecia, una cifra qu'acordaron los 28 en xunetu y que dexó pa más palantre l'asignación d'otres cerca de 8.000 places pa dar refuxu en total a 40.000 persones.

   Ante la llegada masiva de refuxaos qu'escapen de conflictos como'l de Siria, el presidente de la Comisión Europea, Jean-Claude Juncker, presentó'l pasáu miércoles un segundu programa urxente pa recibir a otros 120.000 inmigrantes con derechu a protección internacional, esta vez llegaos a Italia, Grecia y Hungría.

   D'esta segunda iniciativa, a la que s'espera que los ministros dean esti llunes el so apoyu políticu, el Gobiernu dixo yá que va aceptar la cifra que-y asignó l'Executivu comunitariu d'entamu: 15.000 persones.

   "Vamos formalizar l'acuerdu de xunetu sobre la base de lo que llegamos a acuerdu y los 15.000 que nos asignó agora. Nun vamos cuestionar cifres que tán zarraes", atayó.

   Fernández Díaz quiso sorrayar l'esfuerzu que realiza España na acoyida d'inmigrantes y pidió "poner en valor" qu'esti añu les autoridaes españoles van tramitar 35.000 pidimientos d'asilu, incluyíes les cuotes negociaes nestos dos programes cola UE, según les estimaciones del Gobiernu.