Na grabación, titulada '¿Quién da menos?', inclúinse imaxes del subastador, arrodiáu de postores del primer mundu, y de 'los llotes', que son grupos de persones procedentes d'África o Asia que, en munchos casos, apaecen yá afogaes.

   El videu ye una acción de la campaña UErfanos, puesta en marcha pola CEAR ante'l creciente númberu de persones que muerren nel Mediterraneu tratando de llegar a Europa: cerca de 2.500 mientres 2015 y más de 25.000 nos últimos 15 años, según asegura la organización.

   La Comisión d'Ayuda denuncia asina l'escasu compromisu de los países de la UE, lo mesmo nel númberu de persones acoyíes como nos medios pa evitar que cientos d'elles muerran nel mar.

   "Mientres los últimos meses vimos cómo los Estaos de la UE regatiaben nel númberu de persones a les qu'ufiertar abellugu con una frialdá más propia d'una casa de puyes que d'unes instituciones de les que dependen vides humanes", declaró Estrella Galán, secretaria xeneral de CEAR.

   "Queremos mostrar la conexón ente dos escenes bien alloñaes físicamente, pero qu'en realidá tienen muncho que ver: les muertes de miles de persones nel Mediterráneu y les decisiones que se tomen en Bruxeles", esplicó Galán sobre'l videu.

   Al traviés d'una recoyida de firmes, la campaña UErfanos pide a les autoridaes europees que meyoren el sistema de rescate pa evitar más muertes nel Mediterraneu, que se desarrolle una nueva política de migración y asilu basada nos derechos humanos y que se faciliten víes segures a les persones refuxaes, que munches veces vense obligaes a ponese en manes de les mafies y a entamar travesíes mortales.

   "La Unión Europea nun pue mirar pa otru llau y tornar los sos valores y les sos obligaciones llegales colos miles de persones que fuxen de conflictos como los que se viven en Siria, Eritrea o Nixeria", reclamó la vocera de CEAR.

Foto: Youtube.