Esti segundu plan súmase a les primeres 40.000 places pa demandantes d'asilu que los Ventiocho comprometiéronse a repartise pa solliviar la presión migratoria sobre los países que más refuxaos reciben, anque hasta'l momentu los Estaos miembros concretaron la reubicación d'unes 32.000 persones.

   "Falamos de 160.000 persones de les que los europeos tienen d'ocupase. Tenemos que recibilos con brazos abiertos y espero qu'esta vez toos s'impliquen nesti esfuerzu", alvirtió Juncker na so intervención ante'l plenu de la Eurocámara n'Estrasburgu (Francia).

   El xefe del Executivu comunitariu, amás, avisó de que n'Europa "nun cabe" emplegar criterios relixosos pa definir quién van tener derechu al asilu y quien non. El Gobiernu eslovacu aseguró esti branu que namás aceptaría recibir a inmigrantes cristianos.

   Y refugó "la demagoxa" y populismos sobre la carga que va suponer pa los países de la UE recibir a estos inmigrantes, al sorrayar que'l númberu de refuxaos llegaos a territoriu comunitariu malpenes representa "el 0,11% de la población" de los 28, mientres qu'en países como Líbanu, representen el 25 % de la población.

   Juncker tamién reprochó les declaraciones cruizaes ente los Estaos miembros a cuenta de la crisis de refuxaos y los ataques a Bruxeles, de la que criticó que dellos gobiernos europeos nun tean cumpliendo dafechu les normes europees en materia d'asilu y refuxaos. Por ello, dixo, la Comisión Europea va abrir dellos espedientes sancionadores "nos próximos díes".

   "N'Europa casi tol mundu recibió refuxuu dalguna vez", dixo Juncker p'apelar a la solidaridá de los Estaos miembros y recordar episodios del pasáu nel que refuxaos europeos fueron acoyíos en países vecinos, por exemplu mientres el nazismu o cuando a "los republicados españoles recibiéronlos en campos de refuxaos al sur de Francia" tres la so derrota na Guerra Civil.

   El presidente de la Comisión dixo "nun ser pesimista por naturaleza", pero consideró que "la situación seya de color de rosa n'Europa". "La Unión Europea nun ta en bon estáu, falta Europa y falta unión", atayó.

   Nesti sen, Juncker calcó en que la UE ye vista como un llugar d'esperanza y refuxu pa los inmigrantes qu'escapen de conflictos y zones inestables, daqué de lo que, al so xuiciu, "tendríamos que tar arguyosos, en cuenta de tener mieu".

Foto: VINCENT KESSLER / REUTERS