El ministru d'Educación, Cultura y Deporte, Íñigo Méndez de Vigo, reconoció que "nun ye normal" que los llibros de testu de Primaria cuesten a les families 300 euros de media por alumnu y afirmó que'l Gobiernu lo que pue facer pa "desaniciar" esta situación ye "ayudar" a los padres pa que la vuelta a escuela "nun seya una carga escesiva".

   "Nun me paez normal", afirmó'l titular d'Educación nuna entrevista en Los Almuerzos de TVE, recoyida por Europa Pres, na que recordó que "una de les primeres midíes" como ministru foi poner "enriba de la mesa" 50 millones d'euros p'ayudes a la compra de llibros de testu, de los que la metá arrebañó de los presupuestos de 2015 pa repartilos esti mes de setiembre.

   "Yá sé que con esto nun se satisfacen toles espectatives, pero ye un bon pasu y toles comunidaes autónomes tán contentes porque hai qu'ayudar a los padres", recalcó Méndez de Vigo, p'añadir qu'esti repartu, que'l Gobiernu eliminó nel 2012, ye posible porque España "vuelve al crecimientu" tres un "gran esfuerzu".

   Sobre l'entamu del cursu escolar y la implantación de la Llei Orgánica pa la Meyora de la Calidá Educativa (Lomce), el ministru señaló que nun tien "nenguna duda de que la llei va cumplise" y que aquello que nun entre en vigor esti cursu escolar, como les evaluaciones d'ESO y Bachilleratu, "va vagar pa debatlio y pensalo bien".