L'Executivu comunitariu confirmó'l pasáu vienres que va pidir a los Gobiernos europeos qu'acueyan a otros 120.000 refuxaos d'Italia, Grecia y Hungría nel marcu d'un nuevu mecanismu de reubicación temporal que va proponer esti miércoles nel marcu d'un paquete de midíes pa facer frente a la crisis de refuxaos.

   La Comisión propón qu'a 54.000 refuxaos esti añu n'Hungría los reasitien n'otros países de la UE, 50.000 de Grecia y 15.600 d'Italia, cifres que representen el 62 por cientu de los refuxaos llegaos nos últimos meses nos trés países.

   España ye'l tercer país al que más esfuerzos d'acoyida va pidir la Comisión Europea, al pidi-y que reciba a otros 14.931, según el borrador de la propuesta de Bruxeles, filtrada pol diariu holandés 'De Volkstrant'.

   La Comisión Europea va pidir a Alemaña qu'acueya otros 31.443 refuxaos y a Francia, 24.031 refuxaos, los dos países que más esfuerzos tendrán que facer según la propuesta de la Comisión Europea.

   Polonia, unu de los países que refugó de forma tayante cualquier sistema de cuotes, tendrá qu'acoyer 9.287 refuxaos, Países Baxos 7.214; Bélxica 4.564; Suecia 4.469; Austria 3.640, Finlandia 2.398, Portugal 3.074 y Rumanía, 4.646.

   República Checa y Eslovaquia, otros dos de los países que xunto con Hungría y Polonia encabecen el refugu a una repartu basáu en cuotes obligatories xunto colos bálticos, tendríen qu'acoyer respectivamente 2.978 y 1.502.

   Los países que menos refuxaos adicionales tendríen que recibir son Malta (133), Xipre (274), Estonia (373), Luxemburgu (440), Letonia (526), Eslovenia (631), Lituania (780), Croacia (1.0649) y Bulgaria (1.600).

Foto: STOYAN NENOV / REUTERS